Село Зовиќ

Село Зовиќ е лоцирано во општина Новаци, на 50 км од Битола. Во близина на селото течи Градешка Река, на која што се наоѓа едно од најубавите зданија во мариовскиот крај – Зовичкиот Мост.

Мостот е изграден 1955/56 г на местото на стариот дрвен мост, кој се преполовил под товарот на еден локален селанец, кој водел претоварена воловска кола. Веднаш потоа е изграден новиот (постоечкиот) мост од мајсторот Џуладин од Струга.
 Воодушевен од убавината на мостот, најпознатиот македонски режисер Милчо Манчевски, сними дел од својот филм „Прашина“, токму на ова место.
Под мостот на една висока карпа е насликан светецот Свети Ѓорѓи, како еден вид на остаток од црквичето кое постоело таму.

Во село Зовиќ има две цркви.

Црквата Св. Никола е лоцирана во центарот на селото и е изградена 1862, претрпела големи оштетувања за време на Првата Светска Војна и е обновена 1927 година. Интересно за оваа црква е податокот дека нејзините ктитори, односно два од побогатите селани кои го помогнале нејзиното градење, се презентирани како светци на влезовите на црквата, што претставува вистинска реткост во овие краеви.

Црквата Свети Атанасиј е мала еднокорабна црква изградена надвор од селото во XVII век од кога се смета дека и селото постои на ова место.

Зовиќ е една од најпосетуваните локации во Мариово, и неодамна неколку куќи се обновени и истите се понудени за ноќевање на странски и домашни посетители.